Rom 16 | ASO | STEP | Alungo ma gulive Hoibe' lengita naani' nene nasahili' i-dilizave lo eze monovo've ti' lo nolo-lingimuve: Aza nene Izesu' evenele Kenekelea ebeku' mulise milaa' nada mono' gono daa' ine' alu nene neive.

Romans 16

Paulo' Evene' Muki' nGopo'ni Line' Gamazi

1 Alungo ma gulive Hoibe' lengita naani' nene nasahili' i-dilizave lo eze monovo've ti' lo nolo-lingimuve: Aza nene Izesu' evenele Kenekelea ebeku' mulise milaa' nada mono' gono daa' ine' alu nene neive. 2 Nemu' nene Izesu' evenele zuho ilizado' lisihe' o neine' monovolo' nene e'meti Guvelesi vemu' ve li ele'mize lamine' ilizave lo noluve. Ido' aza nene evene' vaikisi nenikisi hize ele' o-ledaa' ine' nenako nemu' nene inite' ne'mine mana'minemu' vise' iline' nene lingine hize ele' i-dilo.

3 Ido' nezesi makato' Izesu' Kilisito' gono daa' une' aleve Pilisikangi ido' vanaho Akuilangi nene ngopo'ni noluze. Li-ngimilo. 4 Ingine nene ngibili hilaa' akalo' vi neni' lukuvo nimasine' ve. Nemu' nene naza engikumu' isetine ve lo mulu'neu' lamine' gelaa' nouve. Ido' nenikovo' nevoba asi Izesu' evenele zuholiti mulise muki' heta ato' vetingu' mini'mi monani' inginesi nene a'minemu' mulu'ningu' lamine' gilaa' nave. 5 Ido' engi' numu'ningu' mulise milaa' navesi nene ngopo'ni noluze. Li-ngimilo. Ido' Asia misubou' aleveuti' gana' Kilisitoda vo gi'mizive lu'ne eme nouve Epaineto'ni nesi nene opo'ni noluze. Li-imilo. 6 Ido' lengito' gono amuzo molo daa' ine' alu Malia'ni nesi nene opo'ni noluze. Li-imilo. 7 Ido' neni' ne'mini Zuda ve minasive nenikisi makato' galapusolo' minunive Adilonikongi Zuniangi nene ngopo'ni noluze. Li-ngimilo. Aposololiti muliseu' nene engi' gulive'ine dize minine' ve. Ido' ingine nene gomu' mili nimi Kilisitoda vi gi'mizi minasine' ve. 8 Ido' Guvelesi vela gi'mizusive lu'ne eme nouve Abiliato'nisi nene opo'ni noluze. Li-imilo. 9 Ido' maka' Kilisitoda gono daa' unive Ulubano'nisi ido' lu'ne eme nouve Sitaki'ni nesi nene ngopo'ni noluze. Li-ngimilo. 10 Ido' Kilisito'nimu' gele ele'vole' oga' ive gehepeve Apele'ni nesi opo'ni noluze. Li-imilo. Ido' Alisitobulo' zuho nesi nene ngopo'ni noluze. Li-ngimilo. 11 Ido' neni' ne'mine Zuda ve minive Helodia'nisi nene opo'ni noluze. Li-imilo. Ido' Nalakiso' zuho nesi nene Guvetesi ve'mi zuho nizanako engikisi nene ngopo'ni noluze. Li-ngimilo. 12 Ido' Guvelesi ve'mi gono amuzo mili daa' asive Tilihainangi Tilihosangi nesi nene ngopo'ni noluze. Li-ngimilo. Ido' Guvelesi ve'mi gono vai' amuzo molo daa' ine' alu Pelesi'ni nesi nene opo'ni noluze. Li-imilo. 13 Ido' Guvelesi ve'mi evenele lamine' gehepeve minive Luhu'ni nesi opo'ni lo ei' izeleho neni' ize'neho gelo minine' nesi nene opo'ni noluze. Li-ngimilo. 14 Ido' Asungilito' ve Helegoni' ve Helemesi' ve Patalobasi' ve Helemasi' ve ido' leze zuho engikisi makato' minave nene ngopo'ni noluze. Li-ngimilo. 15 Ido' Hilologo' ve Zulia' ve ido' Neleakisi alunolosi ido' Oliba' ve ido' Kilisito' evenele linge ma engikisi nizani' nesi nene ngopo'ni noluze. Li-ngimilo.

16 Lingine nene O'moso'mi evenelelite ilizado' o minine' monovolo' nene igi adingu' di ge nabuti' ize ne gabuti' ize li minaa' ilo. Ido' Kilisito' eveneleliti mulise mevola mini'mi monadite nene muki' longopo'ni nilave.

Evene' Ma Mono' Di Gopo Igi Li Izesu' Evenele Hizi Ho'li-ngidilizavemu' Gizebo Lamine' Igi Engikumu' Olovo' Igi Minilo Lo Paulo' Line' Gamazi

17 Neze zuhokizo, gatine do naza amuzo molo ti' lo nolo-lingimuve: Ehetine' neve. Lingine mono' ganakuti' gilado' vo damine' gamazi li-lingimi monokuti' limi ingaliza initekisi ido' hizi ho'lilizani' gamazisi lilizavemu' nene gizebo igi olovo' igi minilo. 18 Nene nanitekumu' ve. A'ne'mine ve ingine nene Guvetesi ve Kilisito'nimu' gelekele' iga' navoba asi engi' oko'nine ne'mo lanite' giline' initetokovo' nene gelekele' iga' nave. Gamazi lanite' ine' gamazi soza saza gamazi lisa ingine golosomu' gilamaveti lu'ine nene golo izi ngele'mize gopo iga' nave. 19 Ee, lingine gamazi lamineto' gelekele' iga' nangumu' guvetine nene mo misubou' misubou' buu lo monine' nenako nemu' nene naza lengikumu' nolize izaa' nouve. Ne neiha lingine monovo laminekumu' nene gili nge li minikevo monovo goloso nene lengito' vo gi'mize minamilive lo gele nouve.

20 Ne'mine ikevo hongu lo lamino minaa' monovo do soto' oga' ive O'moso ne'mo nene mine ha'na amo hize ele' o-lengedo neivo Satanisi ei' zuhosi ngivile' gehepeve igi lingine lisi hupi' izi-ngidani' geleleseive.

Guvetesi ve Izesu' nasahili've nene lengita minivoo.

21 Nezesi maka' gono daa' usive Timoteo' nene longopo'ni nolive. Ido' neni' ne'mini Zuda ve minave Lukiole Zasonile Sosipatelole ingine nesi nene longopo'ni nilave.

22 Ido' Paulo' gamazi nolivo luhuvo nite' mene gizuve Teletio' nazasi nene Guvelesi ve'mi evenele nouvonako longopo'ni noluve.

23 Ido' Paulo' naza numu'veu' ongaa' uve Gaio' ei' nesi nene longopo'ni nolive. Eze numu'veu' nene Kilisito' evenele muki' nesi nene mulise milaa' nave.

Ido' mene numuno ebeku' ngamani monilo' gizebo oga' ive Elasito' ve ido' leze zuho Kualato' ve engi' nesi nene longopo'ni nilasive.

Paulo' Gamazi've Lo Osu' Lo O'moso Opo'ni Lo Line' Gamazi

25 Naza mono' gamazi lamine' lo soto soto' nouvoni' ne'mo nene O'moso'mo monoku' do ngi lo-lengedelido' o neive lo neine' ve. A'mine gamazi nene Izesu' Kilisito'nimu' gamazi lamine' nene neive. Gamene gala'mudati' vomine a'mine suno' gamazi haleke minine' nene vo'mo vo'mo ogo idise mene soto' nopizive. Ee, heta ato' ve muki' a'mine gamazimu' nene gili gili ele'vole' igi a'mido' gelekele' igi e'metilizave lo idise nene minevo' minevo' O'moso ne'mo lavo polohetelite gizikani' gamazi nene lo-ngemo a'mine gamazi nene heta ato' ve mukita nene lo soto' nounivo a'mine gamazi nene soto' nopizive. 27 O'moso ei' hamo' nene otohato ve ne neive. Ne'mine o neize. Laza nene do hozi lo-do Izesu' Kilisito'nimu' ve lo opo'ni lo minevo' minevo' ogo minelone' nene oku' lamivoo. Ne'mine ogo miniliho.